ప్రభుత్వ రంగ విమానయాన సంస్థ ఎయిర్ ఇండియాను సంస్థ ఉద్యోగులే కొనుగోలు చేసేందుకు సిద్ధమయ్యారు. ఇందుకోసం 209 మంది ఉద్యోగులు బృందంగా ఏర్పడి.. ఓ ఫినాన్షియర్ భాగస్వామ్యంతో ఎయిర్ ఇండియాకు కొనుగోలు ఆసక్తి వ్యక్తీకరణ(ఈఓఐ) బిడ్ దాఖలు చేసేందుకు కసరత్తు చేస్తున్నారు. ఈ బిడ్ ప్రక్రియను ఎయిర్ ఇండియా వాణిజ్య కార్యకలాపాల డైరెక్టర్ మీనాక్షీ మాలిక్ నిర్వహిస్తున్నారు.
14న ముగియనున్న గడువు..
'ఉద్యోగులు ఎయిర్ ఇండియా నిర్వహణను తీసుకునేందుకు ప్రిలిమ్నరీ ఇన్ఫర్మేషన్ మెమొరాండమ్ (పీఐఎం) వీలుకల్పించింది. ఇది పూర్తయ్యేందుకు కచ్చితంగా పూర్తిచేయాల్సిన నిబంధనలను సూచించింది. మనమంతా వాటిని కలిసికట్టుగా పూర్తి చేయాల్సిన అవసరం ఉంది.' అని మీనాక్షీ మాలిక్ తోటి ఉద్యోగులకు రాసిన లేఖలో పేర్కొన్నారు. ఎయిర్ ఇండియా కొనుగోలుకు ఈఓఐ దాఖలు చేసేందుకు ఈ నెల 14న గడువు ముగియనున్న నేపథ్యంలో ఆ దిశగా వడివడిగా అడుగులు వేస్తోంది గ్రూప్.
ఆర్థిక ఇబ్బందుల్లో పడొద్దు..
సంస్థలో 51 శాతం వాటాను కొనుగోలు చేసేందుకు ఉద్యోగులంతా ఆర్థిక సహాకారం అందించాల్సి ఉంటుందని మాలిక్ తెలిపారు. ఫినాన్షియర్ అందుబాటులో ఉన్న కారణంగా ఉద్యోగులు రూ.లక్ష రూపాయలు ఇస్తే సరిపోతుందని వివరించారు. బిడ్డింగ్ మొదటి దశ దాటే వరకు డబ్బు అవసరం లేదని.. ఈ దశ పూర్తయ్యకే డబ్బులు సేకరించనున్నట్లు వెల్లడించారు. ఉద్యోగుల్లో ఎవ్వరూ రూ.లక్ష కన్నా ఎక్కువ ఇచ్చేందుకు ప్రయత్నించి ఆర్థికంగా ఇబ్బందులు పడొద్దని సూచించారు.
ఈ ప్రాజెక్టు విజయవంతమయ్యే వరకు ఇందులో భాగస్వామ్యం కాని వారితో, ఇతరులతో దీనికి సంబంధించి ఎలాంటి సమాచారం పంచుకోవద్దని మాలిక్ సూచించారు. అలా చేస్తే బిడ్ చేజారే ప్రమాదముందని హెచ్చరించారు.
ఇదీ చూడండి:ఆర్బీఐ ఎంపీసీ నిర్ణయాలపై నిపుణుల హర్షం
